巴黎 shopping 無我份，來到倫敦就唔同講法啦！我編排行程時一早已經準備了去一轉 Bicester Village Outlet 掃貨，後來更想到了這個天衣無縫的計劃：我們是搭夜晚機，最後一日酒店 check out 後租車裝晒所有行李去 Bicester，之後就直接揸架車去機場還車！慳了時間又不用操心點樣去機場！
不過在我們出發去 Bicester 之前，請容許我帶你們先去一個地方。話說當日我們在 Oxford Street 逛呀逛，我發現很多途人手裡都拿著一個寫著「Primark」的啡色紙袋。這間「Primark」究竟是乜東東？！
就在我們行到接近 Oxford Street 盡頭時，終於見到這間 Primark 的廬山真面目！看上去普通，但人流真的很勁！雖然我們還有10分鐘就夠鐘走去食飯，但我跟 EC 都要入去 check it out！入到店內我們就如常的分道揚鑣 — 各自各睇男裝 / 女裝。
男裝在二樓，我上到去，見個佈置有點似 Sogo 9樓的特賣場 — 除了這個「特賣場」有如佔了 Sogo 整層！賣的貨品有衫有褲有鞋有襪，我隨手拿起一件 t-shirt 望望，£4 (HK$48) 之喎！幾抵喎。再行前拿起一對白色的帆船鞋，都係 £5 (HK$60) 之喎！咁平？之後件件衫褲鞋襪都是 £10 (HK$120) 有找，樣樣都咁平嘅！質地當然不能強求，但有些設計都很不錯，怪不得周街都有人拿著它的袋！這有於英國版的 Giordano，但英國真的好少有咁平的鋪頭！我見時間有限，隨意買了兩件衫就算啦。
準時來到跟 EC 約好的大門口，等了10分鐘都未見人，立即躁咗！終於見她急急腳走過來，手還拿著一大個購物籃！遲了10分鐘但原來錢都未俾！有無搞錯～ 好彩阿叔旅行緊，心情靚，如果唔係實鬧爆！我快快脆跟她去排隊俾錢，她見到我黑黑地的面口就立刻解釋點解要買啦。一對粉紅色返工鞋 — £2 (HK$24)；一 set 5對不同 size 的仿珍珠耳環，又是 £2！
平成咁，真係要講多句：有無搞錯～～～
我估d咁嘅 cheap cheap 舖頭旅遊書未必會介紹，但這些才是尋寶的好地方！下次你去倫敦的話，可以諗諗！
Primark Stores
499 Oxford St, London W1C 2QQ, United Kingdom
http://www.primark.co.uk/
OK，可以繼續去 Bicester！我們離開倫敦當天是星期六，都估到去 outlet 的人會不少，加上車程要個多小時，還是早點去好，爭取時間 shopping！
結果因為要在租車公司等攞車的原固，早極都要接近12點才到 Bicester。急急腳食個午餐後就開始掃貨！平時我去 outlet，第一站一定是 Nike。不過這個 outlet 太高級，無 Nike！不打緊，因為我事先已經研究過，有新的頭號目標：Superdry！
你可能心裡面話：「你都戇居居，去英國掃日本牌子？！」咁你就錯啦！Superdry 其實是個英國牌子！！所以在英國 outlet 掃貨先至是最平的！
我一邊睇自己的衫，一邊要遙遠控制幫細妹買，一間 700、800呎的舖，足足行了一粒鐘！3個人加埋買了無30件都有25件貨，好似唔駛錢咁！！我們一到 cashier 俾錢，其餘顧客就遭殃啦 — cashier 條隊立即排都鬼咁長！
但真係好抵！我回來香港後在 Superdry 見到件一樣的 t-shirt，香港標價 HK$4xx，我只是買 £14 (HK$168)，還有 10% 退稅！
Bicester 個 outlet 雖然不算好大，但勝在牌子夠好，差不多間間都可以入去望。除了女士們至愛的名牌如 Burberry、Gucci、Prada、Coach、Dior 等等等等，一些我未試過在 outlet 見過的牌子都有，包括 Bottega Veneta、Paul Smith、Fred Perry、Mulberry 等等！唯一可惜的是我們真的不夠時間逐間行，加上星期六本地人、外地人、強國人都多，較出名的店很多時都因為人太多要人流觀制，需要排隊等入去。
不過總括來說，我們都是滿載而歸的！Yay～ Mission Accomplished！我們懷著滿心興奮的心情，出發去機場！
PS：在 Bicester 掃貨途中還有個小插曲。話說當我們在*第一站* Superdry 買到破產之後，我自告奮勇拿著兩個超大袋的戰利品先放回車中。誰不知去到停車場，左右兩邊一模一樣我忘了架車泊了在哪一邊！加上架車當日早上才租，除了知道是架灰色的 Volkswegan 外，其實我不太認得，只能憑記得是灰色和車匙上寫著的車牌去找。結果前前後後兜了幾個圈都未揾到！而當時整個停車場已經泊滿，很多車在等位泊，見到像我這樣一大袋一大袋的人行過，一心以為我是掃完貨要撇，誰不知跟我行了一個圈我都還是在行，都運吉嘅！有些人忍唔住，攪低個窗問我：「Where is your car? Are you leaving?」
我唯有無奈的答到：「I am also looking for my car! I forgot where I parked it! And I am not leaving yet.」
結果我行了超過10分鐘，才終於找到自己架租車。(火羅)爆！
Please come like my Facebook Page if you find my blog interesting: https://www.facebook.com/jailbreakplato
Platoooooo's Blog 