過大海上集之「賭神有朱古力 E神有香口膠!」

趁著重陽節小小地一日假,又見酒店有 promotion,跟 EC 去澳門看她一直很想看的「水舞間」,順便住番晚!

澳門自我回歸香港後都去過三五七次,所以除了看 show 外,就只是食和賭。小弟日日縱橫全球最大的賭場「388」,所以對於入賭場賭錢,認真只抱著小賭宜情去 hea 吓的心態。每次入一間賭場之後,用最多時間的不是在賭檯上搏殺,而是遊走整個賭場去找最平的那幾張檯!哈哈!(自嘲)

入得賭場,大家都知道人家莊的贏面在統計學上是食硬你!因此我比較喜歡有選擇權和 / 或可以自己「甩吓牌」的玩意,起碼輸了錢都叫做曾過過手癮。所以通常我會玩 Caribbean Stud Poker。

Caribbean Stud Poker 的詳細玩法,請讀文章後節錄自《蘋果》的介紹。簡單來說,就有如你睇《賭神》玩話事啤,你跟莊家每人5隻牌鬥大。你睇牌後,牌差可以選擇投降輸一半,但如果你去馬,而莊家開牌發現手上最大都是連A+K都無的話,最終亦可以自動投降 (不成局) 輸一半 (這就是賭場贏面大過你的地方,因為基本上它要有一對或以上才跟你隻揪)。如果閒家揸特別靚牌如三條、同花,會贏得到比平常一賠一大 (三條是一賠三,同花是一賠五),不過大前題是要成局,不成局的話你揸4條A都無用!

 

講多無謂,落場打真軍試試我的手氣!不試由至何,一試就勁啦!玩10鋪都開唔到齋!一係牌差自己投降,一係自己手揸三條但莊家不成局!很快手我的本錢就被陰乾了一半。見手氣咁差我就叫 EC 玩,我睇。她一落場立即殺了莊家兩鋪,頭威頭勢!同檯的香港人 (係呀,玩細注碼檯的當然是香港人啦!) 就潤我一句:「靚女坐落嚟係唔同D!」(我苦笑)

到第三鋪,荷官洗牌之時,我無所事事就由褲袋拿了包香口膠,EC 隨手拿了兩粒 (大家記住「兩粒」,係兩粒!將會是故事的關鍵) 派完牌,EC一拿牌上手時我已偷偷見到頭兩隻牌是 pair King。我心諗:「應該又有得贏啦!」EC 疊好牌,開始一隻一隻在牌的左上角甩。頭兩隻是 pair King,我早見到。

第三隻… KING正!

第四隻……

KING!!!!!

OH MY FCUKING GOD咁即係4條 KING?!咁能勁?唔係呀化???

我們看到那第四隻 King 時那種震撼程度,真的真的是不能用筆墨形容!我個心就似玩過山車一開始向下衝時離一離,腦海裡有0.5秒的時間是見到4條King但 process 唔到,0.5秒後才回魂發覺:是4條KING呀!!

第五隻牌係乜?還重要咩?

我隻眼馬上向檯右邊的遊戲規則瞄一瞄,4條的賠率是:1賠20!!Hurray~~~ 但問題是如果莊家不成局的話,那1賠20就會化為烏有!我肉緊地搣一搣 EC 的手臂,兩個人交換了一個開心中帶擔心的眼神。旁邊的阿叔好像聽到我們的呼吸聲有異樣,問句:「副牌好難決定呀?」我倆都不敢答,就是怕事情講了出來就唔靈,到時莊家唔成局點算呀?!

莊家要開牌啦…

…… (咚~~~ 鼓聲…)

一啤 Jack!!

我跟 EC 立即來個 high ten!旁邊各人都有點驚訝我倆搞乜咁興奮,直至荷官幫 EC 開牌…… 各位觀眾,4~~條~~KING!

「嘩!4條!!」
「好彩莊家成到局咋!」
「哎呀!如果你買埋 jackpot 有成5000蚊!」

個荷官見到都呆一呆,立即叫旁邊監場的同事望一望先敢賠錢!1賠20!!Hurray~~~ 我直情想好似巴西的足球員入波後拿著球衣繞場跑一圈,再用大聲公配上評述員「Gooooooooooal~~~~」的叫聲!可恨賭場內唔可以影相,我真想影低這副奇牌!!

在我們還陶醉在那4條King當中時,賭場要揾食,荷官不會等你就派下一鋪牌了。EC 拿上手… 頭兩隻又是 pair King?!唔通又4條King?!

係… 就好啦!第三、四隻都是公仔,不過是Jack和Queen,但第五隻竟然又是King!

KKKQJ,駛唔駛咁大呀!連續兩鋪4條King我就唔敢望,況且如果真的發生,可能賭場位CEO要請我們上去飲杯咖啡逗一逗我倆是不是老千!唯一可惜是隻隻都公仔但都是差一隻就夫盧,夫盧都一賠七呀!

陳小姐,你兩鋪就一個人攞 (攬?) 7條仔 (King),駛唔駛呀?!

——————————————————————————

第二朝,未見肚餓食午飯,又落去玩兩手 (去澳門係咁架啦!) 我一坐落張 Caribbean Stud Poker 檯,又是「未見官先打三十大板」格,成日都要投降輸一半。我突然諗起 EC 昨日一食香口膠就大發神威的情況,於是又在褲袋拿了包香口膠出來,發現原來只剩下一粒。OK啦,照食!唔食由至何,一食,就甩了條蛇出來!有無咁靈?!

在我心裡面正沾沾自喜之際,誰不知莊家開牌… 不成局!我副一賠四的靚牌咁就泡湯了…

我想,一定是一粒和兩粒的分別… 唉…… 又或者,只有賭神食朱古力先變勁,只有E神食香口膠先可以拿4條King!

 

——————————————————————————

話你知 加勒比海撲克點玩

加勒比海撲克玩法似沙蟹(話事啤),閒家及莊家各派五張牌,莊家第五張牌要打開,未派牌投注金額自訂(澳門部份賭場訂注額100或200元),第二次落注要雙倍,即落注100元的話,派完牌後跟注則要落200元。莊家除了「一啤」或「三條」等外,五張牌內如有 A及 K即成局,要與閒家鬥牌。

揸同花順即中 Jackpot

另外,若閒家看過牌後認為會輸給莊家,可以收牌,枱面上的注碼即輸,或輸一半(部份賭場規則)。至於鬥牌賠率亦有不同,一般的規則是,如閒家手中有 Two pair(兩對)贏兩倍、三條三倍、蛇四倍、花五倍等等,若閒家手持大同花順( AKQJ10)則贏莊家200倍。另外,加勒比海撲克亦設累積獎金,賭客可自由選擇是否落注,每注25元,若取得大同花順,除可贏枱面注碼200倍的金額外,亦可取得累積大獎,通常會有數百萬元。

(http://hk.apple.nextmedia.com/news/art/20101113/14657198)

Advertisements

One thought on “過大海上集之「賭神有朱古力 E神有香口膠!」

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s