Category: 我的膠論

多謝 A&F 筋肉人為男士平反

100個穿紅色短褲、赤膊上身的筋肉人，為香港男士平反！ 這個星期在香港見到雌性動物，只要說一句 “Abercrom…” 連個 “bie” 字都未講出口，對方輕則面色一振，重則整個人彈起甚至不其然的尖叫起來。Facebook 充斥著一張又一張的猛男照，幸運的會放上了自己跟猛男們「一后N皇」的合照，超幸運的會放上了自己將手輕輕放在那健碩胸口的 show off 照，最起碼的也會放上一整排的猛男照。 成日話男人咸濕，觀乎女士們都不遑多讓！「男女喜愛玩球」一句經典歌詞原來語帶雙關，可圈可點。問題是女人大波是天生，而且今時今日食得好著得好，身體發育更健存，又可以候天加工；男人大波要後天苦練，何其難求？ 女士們肆無忌憚的將玉手輕放猛男胸前還可以「也文也武」放上網炫耀；男士們只要拍照時隻手隔住件衫掂住女士的腰已經可能被人鄙視，將手放在女士們的大脾已經是活罪難逃，如果手碰到了心口？？大檸樂，相信 Facebook 戶口被女士們一人一句炸爆唾罵至死，指日可待！ 多謝A&F這班猛男讓世間上的人看見了女士們「獸性」的一面，讓我們這些男人平反：咸濕不是我們獨有的！ 𡃁模 OL也瘋狂 A＆ F80裸男癱瘓中環 80名裸男昨日癱瘓中環，令𡃁模、 OL和少女通通陷入瘋狂狀態！原來他們應美國便服品牌來港造勢，向來被宅男圍的模何佩瑜（ Jeana）和許穎（ Phoebe），反被80名六嚿腹肌的裸男團團圍着，她們更趁機抽型男水，飛擒大咬摸胸、錫面又抱抱。 美國便服名牌 Abercrombie& Fitch（ A&F）下周六在中環開舖，昨日號召80名來自美國、英國和西班牙等地的火辣肌肉型男，在街頭宣傳，吸引超過200人圍觀狂影。活動開幕前半小時，已有超過40名少女和師奶排隊等影相，人龍中包括 Boy’z成員 Steven家姐 Jan。活動一開始，不斷有市民圍觀影相，企滿畢打行門外馬路，其間巴士和私家車繼續穿梭，不斷響按，但沒警員維持秩序，場面驚險，有 OL不以為意說：「咁多裸男，中環梗係停頓啦。」直到45分鐘後才有警員到場，呼籲市民散開。 Phoebe：好濕 六嚿腹肌型男一出現，全場即時尖叫， OL影相時更瘋狂失控，場面混亂，甘國亮第一個迫入人堆和地面的40個裸男合照，影完火速走人；至於模 Jeana、 Phoebe和師妹夏然然等，就留下喪抽水，向裸男摸胸和索吻， Phoebe師妹呂娜就忘形露底。…… (http://hk.apple.nextmedia.com/entertainment/art/20120804/16573473)

Read More 多謝 A&F 筋肉人為男士平反

小朋友，你答錯咗啦！

最近有無睇過呢個奶粉廣告？ 老師問：「小朋友，邊個大D呢？」 小朋友答：「啤啤熊… 啤啤熊大過蜜蜂好多架！」 小朋友，老師唔係問「邊種」動物大D，只係問「邊個」公仔大D，所以你諗多咗，你答錯咗啦！我哋學校最唔鍾意D懶醒嘅小朋友，所以唔會收你，SORRY！ 又：今日為這個 blog 上網揾資料時，youtube 見到下面段片，正~~~ yo, check it out！

Read More 小朋友，你答錯咗啦！

8號風球下地獄行車

小弟今日 (星期一) 北上完畢回港，剛好趕及香港掛8波！要在狂風暴雨中從落馬州駛著我的「小白」回薄扶林老家。要知道小白已有兩次在暴風雨中跪低的記錄，令我心存陰影再加多二錢擔心。一條橫跨香港的漫漫長路，小白，你捱得過嗎？我可以相信你嗎？ 撇除我對小白捱得過嗎的擔心，8號波下這40公里的旅程已經夠觸目驚心！ 車才剛開上 highway，我緩緩的駛在中線 (well 「緩緩的」都有60-70km :P) 刻意跟前面的墨斗貨車保持距離。我望著倒後鏡右邊快線一架「順風」貨車如飛殺上，過頭時濺起的水花打在我的擋風玻璃足足3秒有多！我開盡水撥的3秒前路仍是什麼都看不見！！我本能地剎慢但其實心中很怕後面跟得貼的話可能一下撞上來就「賴嘢」！那3秒鐘我的心認真是離一離！ 去到汀九橋，見它說橋的中線封閉，心想3條行車線左中右，不是中間的有左右包抄最不食風？為什麼要封線？上到橋就知點解！一路行一路被那些已吹到「呼呼聲」的風將我的車打橫推！雙手要揸實手軚不要讓車由直線變走斜線，所以揀封中線 in case 司機手軟揸唔實軚盤飄移了三兩米時，都不致會撞到隔離的車！ 終於走了大半段路來到昂船州大橋，有了之前超過20km的經驗但「颱風之中有新事」！大雨突然間變成超超超大雨！又是眼前一遍瀑布！這比之前更可怕因為全條橋上的車都被淹沒在這視線瀑布當中，大家都變成「零」能見度！這次我已經進步了一邊收油一邊打死火燈，但當你眼前一矇仍是好驚好驚！我不撞人都怕人會撞我！ 算小弟孤陋寡聞真的未試過在8號波當中開車可以是咁恐佈！！好彩有驚無險返到屋企，小白靈靈性性無事，唔係邊可以仲係度寫 blog！

Read More 8號風球下地獄行車

德國四強出局 默克爾峰會讓步

外電報道，星期四歐盟峰會會議中支持緊縮的德國與西班牙、意大利等國就援助方案呈膠雀狀態之時，一場歐國盃4強戰成功協助會議取得突破。 德國意大利大戰造就峰會突破 人所皆知是德國足球隊超級粉絲的德國總理默克爾，由於要留在布魯塞爾參與歐盟峰會，未能到波蘭華沙為愛隊對意大利的4強戰親身打氣，所以特別要求會議在球賽期間暫作休息，好讓她能觀看德國隊的賽事直播。 歐盟各國元首在會議室齊看比賽之際，言談間各人為維護自己所捧隊伍而越講越有火藥味，其中以支持意大利隊的元首較多，眾人的口舌之爭當中亦佔上風，齊齊圍攻默克爾。默克爾聽得有點老修成怒之際，突然拋出要跟意大利總理蒙蒂 side bet 賭哪隊勝出。如果意大利隊勝出，自己就對使用歐洲救助基金支持歐豬債券作出讓步；但如果德國勝出，意大利和西班牙就要遵從德國提議的緊縮政策。蒙蒂一口答應。 結果意大利憑壞孩子巴洛迪利大發神威於上半場梅開二度，以2-1擊敗德國。默克爾願賭服輸作出讓步，造就峰會在14小時的馬拉松會議後達成穩定債市和注資銀行等多項措施。   德國在歐國盃被歐豬四國圍剿 黯然出局 今屆在波蘭和烏克蘭舉行的歐國盃由於歐洲的經濟情況，變得更具政治色彩。歐豬多國包括西班牙、意大利、葡萄牙、希臘、愛爾蘭等都能成功打入決賽週。 被歐豬各國圍剿的德國，分組賽被編入「死亡之組」，除了首戰已經要跟「第一豬」葡萄牙正面交鋒外，同組還有橙色兵團荷蘭和丹麥，但仍能以3戰全勝姿態殺入八強。八強遇上奇蹟出線的「第二豬」希臘，4-2輕鬆過關，四強遇上擊敗英格蘭的「第三豬」意大利。本來德國挾著15連勝的佳績，矢志殺入決賽與「第四豬」西班牙決一死戰，一完16年大賽之癢之餘，又可以一舉通殺「PIGS」四國。可惜最終未能打破近7次在國際大賽中未能擊敗意大利的宿命，黯然出局，還連累總理要在歐盟峰會作出讓步。 (純粹小弟搞笑老作，如事實當真如此，實屬巧合！)

Read More 德國四強出局 默克爾峰會讓步

賤人兩位

我不可以說我是一個100%忠忠直直的人，但以下兩件賤事我真是做唔出！ 賤人一 星期日晚上我駕車返家途中，由般咸道駛入山道，見到一輛貨 van開了側邊的趟門、打了死火燈停在路中心。去過山道的朋友會知道，雖然它只是條單程路，但其實非常寬闊，足夠3架車勉強通過。而貨 van停的位置左邊是劃了做錶位，但是當晚那錶位是大大個無人泊的。 我等了10秒8秒，見那貨 van停著不動又不似想走，就用大燈閃了它兩下示意有車在後面，而其實它只需稍稍泊埋一點讓我過就可以了。 無反應。 我再閃多兩下，都是無反應。 本來已經是夜深，我怕嘈醒人沒有響按，但你這架貨 van 郁都唔郁，手勢又唔打個，我都要返屋企架！我唯有大大聲「砵」佢兩下…… 它終於肯施施然撻車駛埋一邊，前前後後搞了我成幾兩分鐘。對這麼無公德心的人我心中有氣，經過時就跟那司機講：「駛埋D啊嘛！」誰知換來一句： 「走啦！X你老母！」 頂你呀！自己阻住條街仲問侯人阿媽！真係離晒大譜！香港有你這種人真是不幸！ 賤人二 我父母出租的一個單位很不好彩早前廁所爆了水渠，不單搞到了租客，還連累樓下的單位，真不好意思！所以我們立刻向樓下「耍晒冧」，還答應會全數負責為他們修補損壞了的地方。 我們找了相熟的裝修師傅報了價，要大概 $6000 多元。大廈本身有買保險，對這些損壞有得賠，不過我們要承擔 $5000 的墊底費，所以最後保險只會賠 $1000 多元。而且由於損壞是在樓下的單位裡面，賠償的支票抬頭人會是樓下單位的業主。Fair enough。 不過你都知 claim 保險不是今日入紙聽日攞錢，本著將心比己的精神，我們都不想人家因為我們而要長時間用一個壞了的廁所，於是我們就叫裝修師傅先做功夫，待樓下那業主收到保險公司的錢後，就可以在把那筆賠償金轉給我們。 誰不知功夫就幫樓下做足了，裝修師傅還好好人，無條件幫他們修了點其他不相干的甩漏，但他們收到支票後就反過來說大廈管理公司話這是他們應得的賠償。問他是管理公司之中誰人講的，又支吾以對，總之就不肯將筆錢還出來！他們已經一分錢都不用付，還白白吞了我們 $1000 多元！難為我們為他們著想，怕他們要對著個爛廁所！ 好人好者家住半山，想不到人格就只值那區區的 $1000！ 事到如今，唯有下次如果 touch wood 遇著同樣的事情，不做好人，要等收齊了保險賠償才肯開工做維修！ 希望香港以後少見這些低等事件！阿門。

Read More 賤人兩位

男定女

這一年婚禮去少了，但 facebook 開始充斥著BB相。要知道結婚相一世人只影一輯，BB相卻可以月計放上網！ 當我與一些已生了B的朋友碰面時，就衍生出一個問題：我唔記得佢個B係男定女？！有時見到面都想問候吓小朋友（plus 大部份有了小朋友的朋友們都是圍繞著BB生活），但我有這麼多朋友已經有了小朋友，你不是認為我可以全數記得嗎？當我不記得 is a HE or a SHE 時，我就不知道該說「你個仔最近點呀？」還是「你個女最近點呀？」，又怕講錯小朋友性別朋友會唔高興（again，小朋友是有些父母的一切）唯有窒一窒，再轉個方法問：「小朋友最近點呀？」或者「你個B最近點呀？」，之後再嘗試用旁敲側擊去揾出性別之迷。 當然，你不要妄想我揾出答案後下次會記得。

Read More 男定女

send email 約大班人食飯

這是email的年代，也是不覆email的年代。 以前讀書時，資訊科技沒有現在那麼發達，電腦還是講緊386、486、586，我中五會考完才有我第一部手機。我記得那是一部銀色的NEC，都幾靚仔架！不過個 screen 只是黑白而且好鬼細，只可以打電話跟 send SMS。Email？No way！那裡似得現今的 smartphone，簡直就是一部微型電腦。 由於現在科技太方便了，大班舊朋友、舊同學約食飯的途徑就由打電話變成 send email。可以用  whatsapp 就最好啦，但有些朋友可能仍未被 iphonized or androidized，而且 whatsapp個 message可以打嘅的內容始終不多，所以我覺得 send mass email 都是比較好。 問題就此出現！send出去的email，點解成日都好似一去無回頭！我明明 send 到各人的work email，點解會10個朋友當中，無10個都有8個唔回覆？你唔好同我話你一個星期都無check過公司email？！咁如果你見到封email，又點解唔覆呢？係唔係每一個人都唔想自己係第一個覆，搞到自己好似係公司好得閒無嘢做咁？定係要睇定D，睇下有邊個去：「如果阿邊個邊個去我就唔去啦；但如果阿邊個邊個去我就梗係嚟啦！」 老實講，要覆的答案通常只有3個：OK、唔OK和唔肯定 (for whatever reason) 。 咁你咪按自己的情況，答囉！OK跟唔OK的情況應該好容易覆啦？我都明白，現今的香港人咁多節目， 好多人都會係「唔肯定」。咁你都覆句「未知呀，我遲D再confirm你，OK？」鍾意嘅，仲可以俾埋個理由。搞function嘅人都係想知揀嘅日子多唔多人得，如果多人唔肯定或唔OK，就可以早早安排改期。有時仲要預人數book地方呢？我問10個人，得3個覆，咁我係應該book 3人檯定10人檯？ 睇完我以上一番牢騷，如果你覺得「我都唔係咁嘅！」，就請你唔需要對號入坐。如果你覺得「你針對我！」，就請你明白我只是攞事實出來講。除非我樣衰係你唔覆 email 的原因，otherwise 個問題的根原唔係我度，係你度。

Read More send email 約大班人食飯

兩份苦差

最近我留意到有兩份工作，本質特別令工作者沮喪。 第一份是洗廁所，尤其是公廁。我看見老邁的洗廁所伯伯辛辛苦苦抹乾淨個地下，都未行返個位唞唞，去廁所的人踩兩腳又是兩個黑黑的腳印，過多5分10分鐘就簡直好似無抹過一樣。日復日都是如此，抹乾淨塊地的原因就是去讓人踩番污糟！ 第二份是商店裡摺衫的 sales，尤其是那些專賣 t-shirt 的部門。要知道隨手拿起一件 t-shirt，看看，唔啱心水，放低，只是3秒鐘的事情。但要將件 t-shirt 摺番好，快手的都要10-15秒啦！我這些笨手笨腳的可能要20多秒，還會第一次摺得唔靚要再摺多次！人多的時侯，會見到 sales 姐姐這邊廂摺完兩三件衫，行開不足5秒又有人拿起件 t-shirt，看看，唔啱心水，放低。簡直就似在跟顧客比一個無贏面的賽！ 特別在此向洗廁所伯伯和摺衫的 sales 姐姐致敬！

Read More 兩份苦差

點解BB奶粉廣告要「便便」來「便便」去？

點解BB奶粉廣告要「便便」來「便便」去？ 這一年以來其中一樣最令我費解的事是點解嬰兒奶粉廣告不斷講BB點「便便」？ 我不是一個爸爸又不是一個BB，可能BB便便唔到真是世間中慘絕人寰的事情，但用我的常理推斷是不是BB的腦部發展才是最重要呢？我賣廣告是不是應該sell這一點？奶粉商是不是廣告sell無可sell所以連「屎」都玩埋？家長是否真的會為了BB的便便而捨棄他的腦部發展？吳君如你是不是真的會因為見女女舊屎靚咗去轉買惠氏？現代香港爸爸媽媽個腦是不是都只裝有「便便」？ 所以我見到雅培個廣告真係要拍爛手掌，真的是一針見血！好嘢！我好肯定雅培個marketing team係用個腦而唔係用「便便」諗嘢。 吳君如便便暢順親身體驗 – 惠氏金裝廣告 2 http://www.youtube.com/watch?v=h7PvVbyESVA vs 雅培 IQ配方 (港孩幼稚園面試淨識講便便下篇) 廣告 http://www.youtube.com/watch?v=-Gifn1wBz88&NR=1

Read More 點解BB奶粉廣告要「便便」來「便便」去？

Black List added：尖沙咀不倒翁

早兩天與三五知己良朋共聚，一人從外國遠道而來，問有餐廳可以邊吃邊看維港夜境嗎？朋友Q立刻call尖沙咀iSquare的不倒翁訂位，餐廳職員說如果有窗邊位會盡量安排。 我們晚上準時7:30到餐廳，餐廳侍應給了我們餐廳正中位置的一張枱，勉強能在窗邊食客的人頭之間望到「小海」。既然訂位時已經講明了想坐窗口位，我們便問部長小姐： 「我哋想訂枱時講低想要窗口位，請問有無枱呀？」 「窗口位每台要收 minimum charge $2000或每人$500，以價高者為準。」  (我們五個人不飲酒，打個邊爐點食$2500呀？) 我又問：「打電話book位時我們專登問有無窗口位，你同事話會盡量安排喎。點解而家又話要收 minimum charge？」 「係呀，如果無人book就可以俾張枱你。」 「咁請問而家係唔係book滿晒？我見個邊 (手指指過去) 仲有幾張空枱。」 「個幾張枱都被人book咗啦。或者我再check下。」 (五分鐘後…) 「先生，個邊有仲有一張枱，minimum charge 要$3000。」 「吓？$3000？頭先仲講緊$2000？」 「噢… 係呀，我哋係價高者得。」 「哈！價高者得？！ (WTF……)  既然你窗口位要收 minimum charge，我book枱時你同事又唔跟我講？等我知道可以有d預算，又或者我可以揀樓上樓下其他餐廳。佢只係同我講『盡量安排』。」 「咁我哋已經 book 滿晒所以無同你講囉。」 「唔係book滿唔滿晒嘅問題，我打得嚟book枱，你就應該講我知原來窗口位要收 minimum charge，唔係一味話盡量安排，我嚟到先突然同我講要俾 minimum charge。」 「咁之前book 滿晒呀嘛… (開始不耐煩)」 「咁你而家既然可以有枱俾我，係唔係即係可以『安排』到俾我？」 「(迴避我個問題) 咁$3000 minimum charge 你哋要唔要張枱？」 「$3000就梗係唔要啦！」 (部長小姐行開咗…)     我知道你哋iSquare嘅鋪租貴，但係唔係咁樣「賣枱」呀嘛？仲夠膽死話「價高者得」？好笑啦！如果我真係肯俾$3000 minimum charge，之後有個豪客入嚟話肯俾$5000，我係唔係要match佢個價？如果唔係食食吓要轉枱？ 其實我們最唔 “kur” 係我book枱時你唔講清楚，嚟到先話我知原來窗口枱有minimum […]

Read More Black List added：尖沙咀不倒翁