首先，希望大家明白個標題：不是我去 test drive 駕棍波車，是駕棍波車 test drive 我的技術！！！
話說這次的「波斯黑克」旅程，我們選擇了做自駕遊，因為我們一行五人 — 除了鐵腳譚虫和鄧雞外，今次多了位新朋友大Lo。五個人，揸車就最方便啦！而且克羅地亞城市與城市之間的距離不遠，每程平均揸兩、三個鐘就到，非常自駕遊 friendly。
5個人坐五人車，夠位坐但未必夠位放行李。我們一開始天真的以為大家帶少點東西，每兩個人帶一個大喼，咁就可以塞落五人車個車尾箱。但當大家一執嘢就知瀨嘢！由於我們今次去足兩個星期，每人只裝半個喼根本無可能！
點解我們要咁辛苦死人都要租駕五人車？租大D、租駕七人SUV咪乜喼都帶得啦！關鍵位是… 東歐始終是相對落後，租車公司的七人車 99%… No! 是 100% 都是棍波車，相反五人車就有比較多自動波。鄧雞考的是自動波牌；小弟雖然是棍波牌，但自從2000年 (無錯，是2000年！) 考到後一次棍波都無揸過！所以當我們發現原來「每人半喼」只是自欺欺人後，不惜中途要換車都想租到一駕自動波的七人車！可惜，事與願圍，點到揾唔到… 咁點算？！
辦法有二：
1) 租兩駕五人車，但有d戇居;
2) 照租駕七人SUV，由小弟個生銹牌揸。
最後，我一鎚定音：(請用普通話讀) 我來！我心想只要到時在停車場操返一陣，應該OK！但我老爸淡淡的一句：「你都係去補吓鐘啦。」立即打窒咗我道氣場，我急急腳在臨出發前一日約了個師傅補番堂。好彩真係去補了這一堂！補完都無乜信心，如果唔補應當真係死梗！
終於來到克羅地亞攞埋車，攞車時租車公司位哥哥仔問我們加多百多元 Euro，把車保加到無墊底的全保，我諗到唔駛諗：加啦！！
平日我將車開到超晒速都無問題，但是今次揸住架棍波車由停車場去隔離個油站那區區500米的距離，死了火無廿次都有十五次。明明只是5km、10km的車速，為什麼那份離心力好像比我揸70km、80km時更厲害？每次我慢慢起步加速到10km，我一邊驚架車太慢會死火，踩多了油門架車快了我就緊張驚失控，落重break剎停架車，又死火了。
雖然後來慢慢開始熟習如何配合支波棍和個「極瀝子」，在路上轉波已經無乜問題，但停車、開車始終是個弱點，每幾次梗有一次死火。平時在紅綠燈開車死火已經樣衰爆 (好彩東歐人無香港人咁 chur，唔係實被人咇爆！) 有一次停車過 immigration，我們五人拿著本 HKSAR 護照很輕鬆就入到境，當我從關員手中拿回那幾本護照，先是想開車就死了火好似好唔想走一般，之後重新撻車時，為免再死火，油門踩多了，駕車一下子飆了向前，亭裡面的關員見到O晒嘴，小弟今次認真是為港增光了！
平路開車都算啦！斜路開車就更得人驚，因為平路開車死火最多架車唔識郁，斜路開車一死火就隨時溜後，好危險！所以在斜路我格外小心，記憶中開唔到車就一定有，但托賴無乜試過溜後，好彩好彩！
縱使路途上都有不少惡劣的情況出現 (之後你就知！) 但總算有驚無險完成了這次在我心中好比是人類創舉的棍波 road trip，在 Ljubljana 還車時認真是鬆一口氣：總算捱過了！雖然這次叫做 pass 了，但我對揸棍波還是有點心有餘悸，無乜事都唔好再搞我！
Please come and like my Facebook Page if you find my blog interesting: https://www.facebook.com/jailbreakplato
Platoooooo's Blog 