寒戰 (含大量劇情!)

相信《寒戰》是2012年下半年最多人期待的港產片。一來戲中演員星光熠熠,劉德華都只需要做「友情客串」就夠了;二來早大半年已經在戲院裡見到勁賣預告片,個大鋼又講到好勁咁!

不過,睇得電影多,最怕就是見到些電影一開頭吹到好大。吹到咁大,最後通常就是收唔到科!根本就無辦法用合理邏輯去解釋。結果觀眾行出戲院時不是「啤」一聲就是「DIU」一聲!

《寒戰》還有一個令我擔心的因素,就是個個演員都話一見到劇本就覺得個故事好得,一定要拍。有無咁 hard sell 呀?成件事搞到好似是個局咁…

話雖如此,戲,都是要看的。

開戲的30分鐘,我已經暗暗感到大鑊。點解?因為預告片的情節已經全部出晒!

梁家輝:「一個城市,可以無咗 ICAC,定可以無咗警察?」
梁家輝:「香港係唔容許有挾持警察嘅事件發生,一次都唔可以!」
劉德華:「非常時期,用非常嘅方法!」
李治廷:「呢個好可能係屬於我們哋時代嘅水門事件。」
梁家輝:「警察最大嘅公敵,從來都係自己人。」
郭富城:「我唔可以俾班犯知道,我哋因為佢,要反轉香港。」

即是一係所有最好睇的情節都已經用上了;一係套戲真係好得,是但剪頭半個鐘的精華已經夠晒吸引觀眾入場。咁你話,你的經驗通常是哪一種多?我好肯定 — 是前者……

讀到的影評都是讚《寒戰》節奏緊湊無冷場、題材新穎、演員做得好… 這些評價我都認同。如果我不帶個腦入戲院的話,我應該都會被洗腦話套戲好好睇。但當興奮過後,腎上線素減退,個人開始用番個大腦思考時,你會發覺《寒戰》「好睇」是因為戲裡有很多懸疑,一個接一個,好緊湊。但你行出戲院時,究竟有多少個是有答案的?

(以下真的有很多劇情,未睇套戲的請三思才繼續讀下去!)

  • 點解要炸旺角百老匯?無交代過… (我睇完全套戲後差點忘記了有這一幕……)
  • 杜文 (尹子維) 女朋友在電影的開頭被一班人擄走了,點解?之後影都無……無交代過…
  • D賊點解咁神通廣大在劉傑輝 (郭富城) 去俾贖金時,好似全程裝了天眼,去到哪個路口都知?如果話是因為劉Sir身上有 GPS 而警隊有內鬼的話,GPS 點會連他甩鞋帶都知?導演是否畫蛇添足?
  • 用剩了的5000萬贖金,揾一架「狗車」幾個警察送回去就算?大拿拿5000萬,咁求其? (我當時已經話我是個賊,打劫那5000萬啦!錢又多d,又無人跟… 果然… 難道我是做警察的天才?!)
  • 第一次向 ICAC 告密的是誰?如果是李Sir個仔李家俊 (彭于晏),希望借 ICAC 捉劉Sir 黃腳雞踢他落台,點解 ICAC 可以拿到只有劉Sir接觸過的人格調查 hard copy (劉Sir 見到就即刻話要揾律師) ?難道是劉Sir的橋?
  • 劉Sir在 ICAC 被盤問時打電話去問 Phoenix (楊采妮) 查誰人?我初初以為是查 Albert (林家棟),因為當時有個wide shot 影到他在後面,但睇完成套戲似乎他不太關事。查李Sir?究竟查到什麼?無交代過…
    (UPDATE:朋友說是查金庫位仁兄。OK,我buy。)
    同埋點解劉Sir不直接打給 Phoenix?
  • 第二次放在 ICAC 張Sir (李治廷) 車頭的料,老頂 (徐家傑) 講到再查會越權,後來又講到d料堅到要「一哥」 confirm,究竟係乜料?無交代過…
  • 其實成套戲究竟叫 ICAC 幫手查什麼?當李Sir 飲完咖啡行出ICAC 時,劉Sir已經有証據知道誰是黑手,咁 ICAC 除了亂叫兩位副處長去飲咖啡外,幫了什麼手?
  • 講到尾… 究竟個綁架計劃係為乜?為錢?但阿仔話希望幫老豆上位;為老豆?綁架前又會知道低一級的劉Sir會 take over 做總指揮?如果 turn out李Sir一直是總指揮,個仔要被老豆捉讓老豆拿功勞?還是阿仔只是想作個故事之後向 ICAC 屈劉Sir有份?但向 ICAC 告密的好似又係劉Sir自己呀…

希望是小弟蠢,睇唔明,咁就請大家多多指教!如果唔係,套套戲都製造一些無答案的懸疑,搞都好似好多支線好緊張咁,套套都是好戲囉?!金田一集集都做看似是無可能的密室殺人事件,跟住… 無解釋如何做成密室殺人…… 好好睇乎?中學老師日日出d 博士生難度的問題,然後… 唔解答你聽…… 好老師乎?

Advertisements

4 thoughts on “寒戰 (含大量劇情!)

  1. 點解要炸旺角百老匯。。。老實講,我都唔係好記得呢度同班犯係點接,就淨係硬係覺得有關連。。。

    杜文 (尹子維) 女朋友在電影的開頭被一班人擄走了,點解?。。。如果冇記錯,佢地好似冇擄走佢。個度查實我既記憶都好模糊,又係要睇番先知。。。

    D賊點解咁神通廣大在劉傑輝 (郭富城) 去俾贖金時,好似全程裝了天眼,去到哪個路口都知?。。。你好似唔記得咗阿輝哥身邊個得力助手都係二五仔之一。加上 IQ195 之所以夠膽玩咁大,就因為係下邊有成班警隊二五仔撐。阿輝全程有自己人護航,唔排除當中就係有二五仔係度串通報料。

    用剩了的5000萬贖金,揾一架「狗車」幾個警察送回去就算?大拿拿5000萬,咁求其? 。。。可能佢嘅思考方向係認為班賊旨在玩啲差佬,唔係啄著啲錢。加上時間緊迫,壓力大,睇漏咗呢啲碎料,冇乜出奇。

    第一次向 ICAC 告密的是誰?。。。呢度嘅流程我家下唔係好記得,又係要睇番先知喇。。。

    同埋點解劉Sir不直接打給 Phoenix?。。。可能驚佢身邊又有個內鬼呱。。。

    第二次放在 ICAC 張Sir (李治廷) 車頭的料,老頂 (徐家傑) 講到再查會越權,後來又講到d料堅到要「一哥」 confirm,究竟係乜料?。。。應該係寒戰嘅機密資料之類嘅嘢。當時其實係講得幾清楚下,不過家下唔係好記得。唯一有印象嘅係話個啲係阿陸sir都未必會知嘅嘢,所以機密程度可想而知。

    其實成套戲究竟叫 ICAC 幫手查什麼?與其係話幫手查嘢,倒不如話係想借佢地嚟睇下挖到啲乜料,順便刺激下自身思維,睇下自己有乜睇漏咁喇。。。

    講到尾… 究竟個綁架計劃係為乜?呢個其實好簡單。就係個仔睇劉sir唔順眼,整色整水嚟畀大家睇下呢位明星接班人,呢個寒戰行動嘅總指揮係幾咁無料,幾咁失敗。之後再畀佢老竇破案,等佢威晒,自然處長嘅位就等著佢老竇嚟坐囉。IQ195 自己本身係唔會有事,因為下邊已經有好多兄弟等著去做替死鬼。但佢世估唔到,劉 sir 會咁精,佢老竇會肯夾埋嚟冼佢。

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s