東歐遊之九、火車上 check passport 嗎

這次東歐之旅只有區區9天但我們要橫跨3個在不同國家的城市，又不想玩得像旅行團那般走馬看花，所以我和 Cam 選擇了在交通上落手，爭取時間 — 坐 red eye train！

Cam 起初都不是太想，怕火車搖晃無覺好瞓，第二天無精神玩仲浪費，不過礙於行程緊湊，所以都勉強答應。我雖然都幾醒瞓，但上次在西班牙從馬德里 (Madrid) 坐過 red eye 去巴塞隆納 (Barcelona)，感覺良好，所以對這個慳了時間還慳了酒店錢的方法舉腳贊成！而當我們上網查火車時間表時，發覺由布拉格 (Prague) 去克拉科夫 (Krakow)，與由克拉科夫 (Krakow) 去布達佩斯 (Budapest) 都各自只有一班直通車，而兩班車都是 red eye！呵呵，咁無辦法啦，Cam 連最後反對的機會都沒有了！

我們在香港時已定好了去各城市的日子，就想上網預訂車票。誰不知原來這是一件很困難的事情！首先，火車公司的網站是捷克文為主，雖然也有英文版但有點怪怪的。我們慢慢摸之中發覺原來它們只接受捷克本地的信用咭和只會將車票寄去本地地址！吹脹！再研究之下我們找到了一些歐洲的旅行公司可以「代訂」車票，再用 DHL 寄來香港，但要收 US$40 運費，仲貴過張車飛？？

到捷克才買飛會否賣晒？但 Cam 說網上的留言是這些東歐火車平常都不會坐滿，所以落地才買應該不是問題。既然那運費咁Q貴，就搏一搏啦！

我們到布拉格的酒店後，第一件事放低行李，第二件事就是去火車站買車票！

噢… 無問題！真係一D都唔滿！

順利買到有床有得瞓的包廂！我大鄉里無乜經驗在歐洲買火車票，原來除了放下「買飛錢」外還要買「留位費」！什麼是留位費？買飛不留位，就好似你買了飛機票不劃位，去到機場才由地勤姐姐幫你揀個所謂最佳座位，可能只剩下 middle seat 跟 middle seat 讓你揀。如果我和 Cam 想確定有一個私人車廂，不用跟陌生人分 (就可以鎖門安心瞓覺)，就需要留埋位最穩陣。還有一樣奇怪的事，它們的車廂都是三人座，所以我們兩個人還要付那第三個位的留位費 (但不用買第三張飛)，才能確保不讓他人買到。認真虧他們想得到！這還肯定了他們的火車是常常不坐滿 — 明知道車位都賣唔晒就屈你幾蚊留位費都好！內地的火車公司，可以諗諗佢，學習學習 (普通話)！

在我們正式搭火車之前，還有一個非常重要的疑問一直都未能找到答案。我們在一些旅遊群組上讀到有些人說上了火車後，只要出示車票給票務員就可以；亦有人說票務員會收起乘客的護照，直至下車時才會交還；還有人說要小心一些騙徒會扮是票務員，拿了你的護照後就一去無回頭！嘩！各種說法，那麼如果真的有位票務哥哥說要收我護照，我俾，還是唔俾好呢？？

為安全計，我已事先用電話為自己的護照拍照留念，而備不時之需。買車票時我們遇見一個不太有效率、英文麻麻地但好好人事的阿嬸時，立即用盡渾身解數、豐富的 body language 去問清楚究竟行程中有無人會收護照？！

「No No No…」阿嬸另晒頭、語氣堅定地說。

所有去東歐旅行的朋友聽住啦：無人會係火車上收你護照！小心騙子！

至於車廂的內籠如何？講多無謂，睇相最實際！

由布拉格去克拉科夫，單程車費是 EUR 40 加 EUR 14 的留位費，但因為我們要將車廂內的3個位全部「包起」，所以我們兩人是要共付 EUR 42 而不是 EUR 28的留位費。車廂外表殘舊，內籠都舊舊地但算係咁啦。