戇居36小時 (FINAL)

三色台套新劇《On Call 36小時》我期待已久。原因不是我覺得它會是非常好睇，已是小弟在我的醫生細妹薰陶下，對醫生每天在醫院的工作都叫做有了少少認識，所以如果連我都一看就知是錯的劇情，就一定是「超錯」！D醫生朋友肯定會睇都想爆樽！(但佢地又會一邊爆樽一邊睇… 香港人係咁矛盾架啦！)

為了令小弟看此劇時可以更投入，及訓練我的 critical thinking，我矢志向每集的戇居 (on call) 劇情質詢一條問題，娛人娛己！歡迎大家提供你的戇居 (on call) 問題 too！

============================================

觀眾們 on call 了 25 小時終於睇完成套《On Call 36小時》，有點可惜不是36集呢！=P

一如所料講「on call」的劇情基本上頭三集就講完，之後就只是不斷用主角們個口講「on call 36個鐘」。well… 總的來說劇情都算是不過不失啦！不過如果考慮到套劇的 cast，我就覺得算超額完成啦！你看看張宣傳 poster，第一、二行6個主角，擔正的馬國明、楊怡都未算是穩坐一線，第3個羅仲謙是睇八卦雜誌講他一腳踏n船為大家認識，第4個黃智雯是剛好在《缺宅男女》做惡關二嫂先紅起來，第5、第6的袁偉豪和張慧雯我仍然未背到佢地個名。

終於唔駛金睛火眼「目及」實套劇，可以摺埋自己唔駛追劇，同埋每晚早一個鐘瞓！(我通常夜晚睇 myTV 重播)

最後最後，記得睇埋我第二十五集的 comment 呀！

PS：剛剛讀到新聞上兩個月一位年輕有為的醫生無啦啦跳樓自殺，當時無人知點解，昨日醫管局終於公怖原來他中了 HIV。即刻諗起炳燦被佢有 HIV 的 ex 刺傷流血一段…

(http://hk.apple.nextmedia.com/template/apple/art_main.php?iss_id=20120318&sec_id=4104&subsec_id=11867&art_id=16166722)

============================================

第一集：點解神經外科的醫生 on call 又要睇胃痛的病人，又要睇小便有困難的病人？其他專科無 on call 醫生？

第三集：

么姐：「都無理由呀成日要捱36小時架嘛！你地唔夠瞓呀，點可以睇好病人呀？」
魚仔：「… 幾廿年以來，醫院嘅規矩都係咁架啦，都無得變架啦… 」
么姐：「幾廿年規矩咁又點呀，唔代表無得變架嘛，想收買人命咩？」

又講得啱喎，咁搞法想無醫療事故都好難啦？如果一位醫護人員是因為 on call 36小時後，睡眠不足而影響判斷出錯，要負重責的是不是應該是個制度？

———————-

點解兩位專科 trainee 可以晨早流流咁得閒睇晒陳校長成個手術？無病人？btw，手術室個日子真係播劇個日！係咁巧合還是事後 key 上去？！

第四集：

最後一段在選擇救駱家俊 (被撞傷者) 還是金世榮 (醉駕司機) 時，醫生細妹話現實中，如果第二份報告在短時間內 ready，確實應該等埋佢才決定先幫誰做手術。

———————-

張一健醫生，請問你幫金世榮搓什麼？講都你咁勁但做心外壓做到好似按摩咁？連我行外人都睇得出…

———————-

當張一健醫生幫金世榮做心外壓和用心臟除顫器時，因為有外來 movement 所以個心電圖係會因此有起伏，不會一直維持一條死線 (多謝醫生細妹賜教！) 不過我都明白，唔 show 一條死線的話，觀眾會誤以為病人有救嘅…

———————-

比較一下洋蔥跟一件頭在第一集開始時為被撞傷的小朋友檢查就高下立見。醫生細妹話一件頭怕小朋友撞傷脊椎所以要用磚頭固定頭部，咁當洋蔥知道一康的頭部受傷流血，檢查時就應該好似一件頭咁察覺他有可能撞傷脊椎，不應隨便將他的頭拎左拎右…

第五集：

一件頭話：「對病人有感覺，證明你開始符合做醫生嘅條件。」

我話：「對病人再無感覺，證明你開始符合做醫生嘅條件。」

不要說我冷酷無情，只是醫生是一個每天都要面對生死的職業，所以對病人太有感情只會令自己的日子很難過。我不是說要對病人莫不關心，但應要盡力醫好病人之餘就保持醫生與病人的關係好了。

第六集：

又 AVM？四集裡面出現兩次，劇情有無d新意呀…

第七集：

范大醫生果然又勤力又好戲，對住個 IE 的 error screen 都好用心工作！不過三色台的場務就差d啦，無得上網就求其開個 file 頂住檔啦！再唔係好似 Kelly 咁玩吓接龍都好呀！

第九集：

第一集先話洋蔥返工前通頂玩唔專業，專頭兩個又自己通頂砌郵輪模型，為老不專！

心瓣發炎組織可以彈上腦咁勁？算小弟孤陋寡聞，覺得非常不可思議！問過醫生細妹，佢話有可能。呢個世界真係乜都有！

第十集：

美雪自從知道子妤是范智岳的女兒後一直黑面神咁對住她，但無啦啦一齊煎塊豬扒就和好？編劇大佬，你有無咁趕呀？Sorry，我都「不太習慣」！

錢醫生願意指導魚仔和洋蔥親身試做心臟搭橋手術，真是好老細的人辦！如果這個世界的老細都可以像他一般肯俾機會、俾信心扶助下屬，不介意下屬嘗試時犯錯要執手尾，肯教又不忌材的話就好了。

第十一集：

究竟三色台的編劇有無追過女仔？同一集第一節洋蔥還在對魚仔死纏難打，第三節已經在毫無先兆下無晒事？今次連塊豬扒都唔駛…

———————-

我代表我的醫生細妹澄清：是麻醉醫生，不是麻醉師！麻醉師是很久以前不需醫生資格時才有的，現在所有屬於麻醉科的都已經是專科醫生。

第十三集：

成集一個病人都無醫過… -____-”

不過魚仔表白個 part 真係幾好笑，楊怡都幾好戲！

第十六集：

自從魚仔向一件頭表白後成個 tone 就轉晒，連續兩集都由魚仔好似鏗鏘集般做旁白。做醫生的反思係好有意思，但如果 day day 的情信都講呢d，是否真的太不浪漫？！可能魚仔估一件頭d咁悶嘅人係要寫d咁悶嘅東西先夾。

———————-

鏡頭影到迪迪仔宣誓完做醫生後講晒老命飛的返醫院見嫲嫲，仲電梯都唔等要跑樓梯上病房 (其實係咪仲慢咗？) 但班同學都只是比他慢了兩分鐘就到了病房…… 咁我都明白當一個人好趕急個心好亂時，就很容易會作一些不理性的決定。

第十七集：

點解男姑娘次次都賴個更表，不可以出席個仔的學校活動？醫生們可以每個月出更表前 request no-call，無理由護士們不可以？

———————-

龍仔入醫院檢查後又話自己頭暈唔舒服，班醫生見係自己友就答應檢查完一次又一次，咁樣算唔算濫用政府資源？

———————-

一件頭找到了那個顱咽管瘤手術的光碟，但就上班前叫美雪自己去他房間的抽屜拿，偏偏自己的抽屜收起了這麼多很怕同屋知道的秘密情信… 根本就唔 make sense！如果他這麼著緊那些秘密情信就應該會話：「都係等我攞俾你！」

第十八集：

隻 tvbuddy 竟然講成係全城熱爆搶住要嘅公仔！！！我接受唔到囉！

見到一康可以「站起來」一刻的感動位，一比之下演技高下立見！黃淑儀 (笑姐) 喊到七情上面，但馬國明 (一件頭) 就睇落去「欲哭無淚」。後生仔，俾d心機練演技啦！

第十九集

我知道點解一件頭今晚射極都射唔入！唔係因為魚仔對他態度突然轉淡，是因為他轉了場！平時射開中山公園的籃球框，突然轉了去卜公，個場又細個框又矮，射唔慣是好正常！

第二十集：

成集最爽就係見到炳燦狂數美雪！其實袁偉豪做呢個界女醫生真係好神似…

跟醫生細妹講開套劇，她說快要做完唔捨得，因為雖然有很多「笑位」，但有些情節又真真地。例如呢？例如醫院裡有些護士真的好似淇淇，成日對醫生們表錯情！但另一方面，一些醫生雖然貌似 seven (下面剪圖個醫生哥哥 look 好神似！不過 sorry，我真係唔知你由哪一集開始爆出來同埋叫咩名…) ，但仍很受護士們歡迎，隨時娶個靚爆鏡的護士老婆返屋企！

第二十一集：

進入結局編！得番5集，個編劇梗係好趕！竟然同一集裡面…

先講魚仔幾嚮往再同爸爸媽媽再一次一起吃聖誕大餐，

返屋企後見到阿媽，立刻無晒個份浪漫憧憬鬧到阿媽狗血淋頭，

之後閃電發現錯怪阿媽和好與初，15分鐘內反轉再反轉，我覺得有點兒吃不消！

———————-

點知都未消化完，又多一劑！莊醫生與貌合神離的老婆婉瑩鬧「分開一下」，

轉個頭飲醉酒揾一件頭發洩點知就立即被點醒，返去 tum 返個老婆，前後用了不足10分鐘又搞番好一段關係！個編劇應該可以提名和平獎…

第二十二集：

一康之死的確令人覺得非常婉惜！雖然整集充滿著悲傷，但我的工作仍要繼續！

———————-

終於三色台揾到個識打籃球的人扮打籃球啦！原來一康企番起身打波咁掂！

———————-

好期待做慣小人物的艾威入手術室做大手術！

第二十三集：

做完換心咁大個手術，咁快可以出來打籃球？！唔好玩我啦… 你真係當d觀眾3歲細路仔咩…

第二十四集：

炳燦之前中招可能感染 HIV，明明話要3-6個月空窗期，咁快已經剩番1個月？如果你話光陰飛逝，已經過了2個月的話，他的 ex 好似只是隻腳有碎骨住院，唔係咁又要住2個月醫院嘛？！

2個月後個 ex 仍然住醫院 — ... 但你個 ex 隻腳碎骨駛唔駛住2個月醫院呀？

———————-

真係好懷疑一件頭是否有 anti-social 的問題，在碼頭一輪嘴數晒魚仔的 worst case scenario，我都想問佢講來做乜？！即係等於一康過身後，魚仔一輪嘴講你點害你細佬行唔到路，又點樣人做醫生你做醫生救唔番你細佬？！

我唯一，陰謀論地，諗到就是你想魚仔大喊一場投入你的懷抱… =P

第二十五集：

等了25集終於見到范大醫生出手！雖然病人是愛女，但做一個咁高難度的手術時仍可以保持鎮定，安全完成！

搞咁耐終於沮喪魚仔的是星形細胞瘤，仲要係偏惡性的，做手術時個 xx 指數跌過落50%樓下好似好危險…. 但是跟住無下文乜事都無，一跳就過了半年魚仔做番醫生無事，The End！！咁就完啦？！難道是要催淚的劇情之前已經做晒？搭好個棚又唔順勢做落去，好徙喎！只係講下佢點醫 -> 心理上與肉體上有幾辛苦 -> 點樣慢慢康復 -> 終於可以做番醫生都好好拍啦！