ICQ 蕉後重生？

出國一星期，只能間中 check check email，睇睇 facebook。突然驚覺無啦啦個個係度講 ICQ，搞乜？真係潮流興懷舊？

我當然記得我的 ICQ UIN！(UIN 這個 term 我想你差點兒忘記了) 當年流落異鄉讀書時，靠的就是 ICQ！跟香港的朋友聯繫、在學校約同學食飯、跟女同學都溝通溝通都係靠佢！以前個年代最 hit 的手機是 Nokia 8210，在那個黑白 mon 玩那個好似食鬼的蛇仔 game 咋！Sony Ericsson 部彩 mon T68i 我 year 3 先有，部電話仲只可以打電話同 SMS，邊似而家咁多功能？

講返正題，究竟點解 ICQ 無啦啦翻生？我搜遍 facebook 發覺係無人知！大家都只是跟風重新開啟那個封了塵的 account。我呢D潮人返香港第一件事當然是在我部電腦裝番 ICQ！原來已經去到 version 7.7，而且非常追上潮流，可以跟 facebook 和 google talk connect — 我諗，這可能就是翻生的主因！

你用 MSN、 whatsapp等最重要是什麼？就是要夠人多！ICQ 當年個個都用，咁都搞到沒落代表佢真係做得好差！當你的朋友一個又一個不再開 ICQ，你個 contact list 只有小貓幾隻 online，梗係唔用啦！開咗 = 無開。但如果可以 link to facebook account 又唔同喎，個個都用 facebook，等於 D contacts 返晒嚟，咁又好似有番D價值。

睇番 ICQ 個歷史，由一間以色列公司 Mirabilis 創造，1998年踏入全盛時被 AOL收購… 哈！怪不得越做越唔掂！你看看 AOL 那個 AIM 咁多年以來都係咁廢，感覺就似停留在 56kbps 上網的年代，ICQ 被它搞垮真是一點兒都不出奇。到2010年 AOL 終於蝕讓給俄國公司 DST。DST 的來頭一點都不小，早已經入股了 facebook、zynga、groupon等。起碼它買了 ICQ 後唔駛一年就已經有個似樣的「中興」，睇下可不可以維持耐一點？

講真，見到ICQ蕉後重生都有D開心，一來它總算陪伴了我整個大學生涯，點都有份感情；二來真係有些舊朋友我只有 ICQ contact 而無 MSN。如果你係其中一個，不妨 send 個 ICQ message 給我。我有點兒掛住個「喔噢！」聲！