讀我這篇blog，首先要由title開始。如果你理解錯誤，就會由「必勝」變「可能勝可能敗」甚至「必敗」。 首先，標題不是「逢新股都抽必勝」。即是如果你看見標題就唔理三七二十一，衝衝衝所有新股都抽，輸了不要賴人。凡股票都有優劣之分，當然不可以一慨而論隻隻買。買股票要「估」得合理，才能提高贏面。 其次，請再留意標題是「新股s必勝」，有「s」，是pleural (標準Chin-glish！) 目的是強調你要持之以恆去抽才能「必勝」。如果你只抽了一隻新股而輸了錢，亦請不要賴人。股票升跌有時侯也講天時地利人和，無可能百分百次次中。如果可以次次中，我咪勁過股神巴菲特？！ 其實新股上市，等於批股。批股通常都要有折讓，因為你要人家接那麼多貨，點都要俾少少bulk discount。此道理同樣地應用在新股身上。所以新股一般都會預留了水位的。水位是多是少，都是那一句：講天時地利人和啦！   既然之前講過新股不應逢股必抽，到底該怎樣決定抽與不抽？我自己通常會看以下指標： 1) 估值、PE貴或平，及與已上市的公司作比較 2) 發行股數與集資金額 – 大規模的新股通常較穩陣，但會因重磅而不會一開始飈升太多，如果不幸「破發」都好有機會升番。如果爆升類型就要選集資額與股數較少的股份，超細的更有可能因貨源少而喪升。不過高回報就當然高風險 3) 保薦人 – 有些人好重視，我麻麻地，但都會留意下 4) 孖展超額認購情況 – supply & demand，多人超購即分得少，所以上市時demand應該高過supply，升的機會就高D。所以我不會第一日就決定申請與否，要先看孖展情況再決定。此外，如果超購很多我可能會抽多D或借孖展博可以分多一點，因為中籤率低   上市後都要金睛火眼睇實： 1) 如果第一日唔對路跌得多，隻股又係唔三唔四股，先走為妙。如果你早已做晒功課知道隻股是好的，當然就坐定定不用怕 2) 有人話炒新股的策略是開市即賣，我不認同。應看情況而定，我的經驗是有耐性選擇性坐好股可以幫你賺多好多 3) 如果唔覺意新股分多了，不代表那股票差，但你應該將超出你預算的部份開市即賣，不要心存僥倖。風險管理是最重要的   純粹分享，所謂「唔辛苦點得世間財」，乜都假，最重要是自己睇緊自己的投資！

Read More 新股s必勝