去年，我在《立場新聞》寫了一篇文章，讚賞渣打香港馬拉松 (「渣馬」) 的網上報名系統，參賽人士只要準時早上7時登入報名網站，大家會自動進入一個排隊系統，不似其他網上系統時時要鬥快按 F5 refresh 搏入到去；報名時亦不會因為被打爆了 server 而 load 得慢甚至 load 唔到。 不過，今年大會「徇眾要求」將報名方法由先到先得改為抽籤。所以，除非你是跑得勁快的電兔，否則大家今年報名是鬥運氣。 我跑了渣馬無10年都有8年，無一年我想報名而報不到的！有一年，我身在南美，都報到喎！又有一年，我真的忘記了報名日期，馬上郵寄報名表，又報到喎！ 我唔明，好地地一個報名程序，點解要改？ 我唔明，點解我想跑個馬拉松，是要靠運？ 我唔明，大會有無好好研究，究竟報唔到名是參加者真的7點登入都爆棚，還是自己遲起身 full 咗就賴登記唔到？因為每一次人家好羨慕咁問我「你咁勁又報到名嘅？我報唔到呀！」我就問佢：「你有無準時7點起身 login 呀？」人家就會好理直氣壯地說：「我9點幾返到公司登入就已經 full 咗啦！」 點解為了這一班根本無一份熱情去報名的人，要犧牲我們這些早起準時報名的人？ 現在玩抽籤，第一、香港人最怕執輸，阿豬阿狗都會係唔係都報咗名，抽到先算，即是比往年更多人報名 (可能這就是改制的原因，可以做靚條數)，抽到的機會再小一些；第二、抱著「報咗先算」而又抽中的人，報名費都只是幾百元，一個月的 gym fee 都唔止啦！報完到時唔想早起身去跑咪算囉！又或者本來一對小情人諗住一齊跑，或者一家大小老公老婆小朋友一齊跑，結果抽籤我有你無，咁… 唔跑啦！所以我估今年出席率一定會明顯降低啦！ 無乜抽獎運的我，應該到時維園見不到我啦！ Please come and like my Facebook Page if you find my blog interesting: https://www.facebook.com/platosays

Read More 點解渣馬要犧牲我們這些早起準時報名的人？

這幾天在追看奧運，最關注的當然是我們女車神李慧詩的比賽 (昨晚還「破例」飛的返屋企追看爭先賽八強)。昨晚見她在今屆奧運再次飲恨，爭先賽八強止步，睇得嬲嬲地，事後訪問都無睇就熄了電視，心裡已經在想寫這個blog。本來寫講的是： 凱林賽炒車後叫大家「唔使擔心」　 跌倒再起　李慧詩續爭金 「擦損咗手同腳，唔會影響周日嘅比賽，稍後早啲返選手村處理傷口，早啲瞓應該冇問題。」 「美雅絲攞到銅牌，算係補償咗我嘅炒車，我心情都平復咗。」 「要同教練講聲唔好意思，大家盡咗最大努力。」 (http://hk.apple.nextmedia.com/news/art/20160815/19736908) 當天在凱琳賽被炒車以至連入決賽爭吓獎牌的機會都無埋，不過事後她一句都無怨過，在鏡頭前連唔開心/不忿/失落的表現都無；旁人看來是她看得開，我卻心想是不是她贏得太多而變得過份的處之泰然？看她場上的拼搏表現，我絕對沒有懷疑她的付出她的努力，不過話晒是四年一度的奧運，輸得咁唔抵都可以咁豁達？她今年已經是29歲，再過4年的東京奧運就33歲，雖然到時如果仍能入圍的話叫做有半個主場，但看到今年幾位較年長的選手都輸在連綿作賽的疲勞之下，她的這種冷靜是不是因為她的深深處贏到有一點點麻目？輸，是不是就輸在心理上這一點點 — 只是一點點 — 的不在意？ 爭先賽排第六　 李慧詩：我個心好痛 「冇諗過會攞唔到啲咩返香港，我個心好痛。」 「冇諗過一撞就入唔到（凱林賽），嗰個勢係可以入到㗎！我冇諗過撞係Anna（美雅絲），我真係用咗好多時間去平復，因為我同佢係好好朋友，同埋之後又要對佢，嗰刻真係接受唔到。」 (http://hk.apple.nextmedia.com/news/art/20160817/19739796) 不過，今早起來讀過新聞，知道她終於在完成所有賽事後，將情緒一下子抒發出來，哭成淚人，也隱隱明白到炒車後心理上 (「我真係用咗好多時間去平復」) 和生理上 (另一報導：「教練沈金康對此表示：『其實很大問題，那天我們到選手村醫院，跟醫生商量如何解決這個痛，傷口又會不斷撕裂，一騎車比賽，傷口又再裂，但她沒表現退卻。…』 http://hk.apple.nextmedia.com/realtime/sports/20160817/55512783) 影響了她昨天在爭先賽的表現。我定必要對我之前 too simple, too naive 的想法向李慧詩和她的單車團隊講一聲 sorry。現在反過來看，跟那些在賽場上努力過但戰敗了的其他香港選手在賽後失落/激動/自責的表現相比，女車神在凱琳賽連入決賽跟各人一爭高下的機會都無，還跌到損手爛腳，當時卻一點情緒都沒有表現出來，我不得不讚嘆沈金康教練除了練車之外，「練人」的能力亦達神級，將女車神在比賽其間的情緒控制訓練到靜於止水，完全專注於比賽當中，也難怪香港的單車隊在沈教練的帶領下人材輩出！ 女車神失落了這次奧運衝金 (不敢說是「奪金」) 的大好機會，相信全香港市民都跟她一樣失望。希望她調節好心情後，繼續踩好她的單車，2020年的東京奧運可以再次見到她出場衝金、奪金！ 題外話，有一種說法，話奧運的獎牌榜是另類國力比拼。美國長期高踞榜首，暫時來說今年英國「超中趕美」排第二，難道脫了歐真的是好一點？香港的勁敵新加坡都憑 Joseph Schooling 在游泳這大項開齋拿下首面奧運金牌。至於香港，你看這幾年要幾亂有幾亂，運勢又可以有多好？奧運比賽，9分努力1分運氣，所以女車神今次之敗，迷信點說可能實在是非戰之罪呢。 Please come and like my Facebook Page if you find my blog interesting: https://www.facebook.com/platosays

Read More 牛下女車神也只是個人