玩完 Split 之後，我們就出發去另一個令人期待的景點 — 十六湖 (Plitvice Lake National Park)。不過中途我們會爭取時間，去多一個景點 Krka National Park，睇瀑布。
當日我們一早8點就由 Split 開車，不過一點都不興奮囉。經過兩日勁好天氣後，這朝天色沉沉，簡直就似是暴風雨的前夕。我沿途開車去 Krka，本來心存希望由烏雲密布的 Split 出發，可以開車遠離壞天氣，但好明顯就不是這一回事。感覺反而似是正在開車去魔界一樣：前面會有著怎麼樣的怪獸在等待著我們呢？！
來到 Krka 時，有如落在魔界的正中心，個天黑到呢~~ 灰爆！本來計劃好來到 Krka 買飛坐船遊覽，結果是冒雨坐了巴士去湖邊，但那邊的餐廳連電都斷埋，我們各位遊客就只能瑟縮在那幾把變成雨傘的太陽傘，等停雨。
還好皇天不負有心人，等了快一個小時雨總算是停了，而且有出太陽的跡象！當我們來到瀑布邊，天色亮了點，拍照出來都好睇一點。這時候，當然我就要拿出我那自拍神器，大家一起合照一番！
拍了幾張，大家都覺得看起來個構圖麻麻，我都忘了是誰說：不如打直影啦！又好，咁我就嘗試將我部紅米手機打直。我將部紅米打直後手指不自覺地給了點力，按了一下那個挾著手機的彈弓…… 部紅米一下子給彈了出來！我望著它跌落我們站著的木橋上彈了一下，清脆利落的「噗通」跌了落湖無水花！
HOLY SHIT！
我手揸住支神器，呆L咗。還是 EC 反應快，二話不說就衝了下去執返部手機。還好我們站的地方水流不急，部紅米跌落水後一動不動在石面無被衝走，EC很容易就執了部手機上來。我一定神，立即熄機、掹電。所有自拍的相到在我部手機呀！！大家急急腳就趕去架車，沿途還被位路人甲有意無意說句：I hope your phone is a Sony！頂！
去到架車，首先我開行個暖氣勁吹部手機，希望可以盡快吹走d水氣。但好似唔多夠勁… EC 提議我應該拿部手機去廁所用乾手機吹，good idea！我拿拿臨去廁所又幫部手機吹了10分鐘，見好似無乜水氣才返到車內，嘗試插電開機。
咦，work 喎！boot 到機，又無唔見相，又無唔見 apps… 正當我心想可以放下心頭大石時，突然個 screen 黐咗線咁跳來跳去，頂！咁點呀！鄧雞叫我快d熄機先啦，然後各人就立刻上 google 揾救星！
「有啦有啦，d人話放部手機落包米到，可以吸水！」
「係吖我都記得好似聽人講過！」
「但我地係克羅地亞喎，何來有米呀？麵粉得唔得呀？」
「麵粉唔知喎，再 google 吓先…. 咦，麵粉唔得呀，一定要米呀！」
「咁點算？」
「唔好理啦，一路揸出去一路揾啦！EC，你可唔可以沿途幫部手機吹住暖風先啦。」
「OK！」
我們抱著救手機如救火的心情，去十六湖的途中，逢見到油站的便利店都入內問有無米賣。Well，你試下入香港的便利店有無米賣？梗係無啦！更何況是在克羅地亞？！
開了兩個多小時車，都已經來到十六湖的範圍內，還是空手而回。就在這時，我見到前面有一間小超市… 超市係咪有大一點機會有米賣呢？大家衝入去問個經理，他指指後面；我們應該是他有生以來聽到有米賣最開心的顧客！買了米後我有如將燙傷了的手放入冰水般將紅米放入白米… relieved……
其實都不知道有無用，但總算是買了個希望！還好我們在十六湖住的是深山裡的小屋，反正手機都是收不到信號，我就乖乖的讓紅米待在包白米內一個晚上吧！
結果？到今日我還在用同一部紅米手機。開心大發現：原來用白米來救浸濕了的手機係… 成功嘅！
Please come and like my Facebook Page if you find my blog interesting: https://www.facebook.com/jailbreakplato
Platoooooo's Blog 