廟街占美

廟街占美

廟街占美天生爛賭，自出道以來欠落世界哥幾十萬波數。但占美就是有佢嘅本事，真係食呢行飯，做馬夫做得頭頭是道。每個月搵到嘅錢雖然還唔到條數，但總有辦法還到息，世界哥都無佢符。占美見剩係還息世界哥都無意見，就疊埋心水老逢還息唔還本。有時占美手風唔順時，仲反過來會問世界哥借多D。世界哥梗係唔多想，但占美次次都還到釘，而且世界哥係砵蘭街個場有時到需要搵占美D女幫手，所以每次最後到俾佢又借多一筆，借下借下就滾到幾十萬。

可惜好景不常，近幾個月占美手下最紅、最搵到錢嘅宮姐同雯女好似《金枝慾孽》裡面班女爭寵爭到出晒面，影響埋D生意。本來就已經搞得火紅火綠，最衰仲有個唔知邊度彈出來嘅小茶係度煽風點火，兩邊就更加班晒馬勢成水火。生意又唔做，搞到占美D收入一落千丈，搵少好多之餘，仲得罪晒D客仔。雖然最終占美都四四六六拆掂咗，但都元氣大傷啦！

轉眼間又到月尾，好彩呢個月D馬仔生性先有錢繼續還住D息，但自從嗰3個女人搞鑊咁甘嘅之後真係再搵唔番以前個數，咁以後點繼續還錢呢？如果連息都還唔到，世界哥就唔會好似而家咁客氣啦！

莫非占美最終都係逃唔過橫屍街頭嘅收場？

************************************************

估唔到上星期日出完個blog，星期二個市就頭也不回落到19000點！幸好真的守得住，我的三腳貓圖表功夫總算無失禮。眼見個市的反彈力度咁弱，都是不要太樂觀。試想想那些被這一浪接一浪、1000點接1000點gap down gap爆的朋友們，當日大跌市逃生無門，所以每當大市反彈一下有些人就會「雞咁腳」走人，又或者當個市升番D又chok一chok時，大家的心裡面的VIX恐慌指數又會標升，就會諗「都係走咗先穩陣D！」在這草木皆兵的時勢，對著市場氣氛來幹實在難有好結果。倒不如少做少錯，手揸現金，就算美金 (即港紙) 點貶值都唔會快得過股市！

總之睇住上星期二低位做人，如果跌落去跌唔穿先諗諗買不買股票撈底啦！

REMEMBER!!!

“Rule No.1: Never lose money. Rule No.2: Never forget rule No.1.”