上回講到小弟一些作為團購顧客的經驗，今日就讓我分享商家做團購的一些意見。 話說年多前的某天，心血來潮上團購網逛逛，一打開個版面就見到天后一間聞名的清湯腩做團購，七五折就可以食到碗牛腩麵加飲品，仲要是每日任何時間都可以用！咁着數我當然就立刻掃番幾張啦！網站上寫著「已售出了14395個優惠」，遲一點都不知會否賣晒！ 買了個優惠後不足兩星期，我就有藉口要過去天后，順便用埋張 groupon！七五折的牛腩麵，質量一點都沒有將貨就價，認真抵食！不知是否食得好happy，平日不太隨便跟陌生人交談的我，跟店裡一位老伙計吹起水來。 「呢個團購優惠真係抵食，我見到就立刻買咗10張8張！… 不過其實你哋都咁好生意，駛乜做團購呀？」 「(有點埋怨的語氣) 咪係囉！做乜鬼團購，平時都已經夠忙啦，而家逢假日更加忙到有氣無掟唞！做死人咩！」 「其實我見通常生意麻麻的舖頭先做團購。」 「咪係囉！」 「或者有D舖頭會只規定得閒D嘅鐘數先可以用，例如下午茶或者消夜時段。」 「我都唔知呀，細老闆個日一返來就話要做團購，我都唔知搞來做乜！無啦啦平比人，又做死我哋。」 (下刪類似重複了幾次的埋怨…) 其實「細老闆」有無想過點解要做團購？如果日日食飯時間都已經坐滿兼門口要排隊，仲送個七五折出街為了甚麼？我想，細老闆一定是抵受不了團購網 sales 的攻勢，聽講他們是十分十分 「chur」 的；又或者細老闆覺得做團購好潮，所以一於跟埋一份。 我都有見過其他已經打出名堂的餐廳做團購，比較合理的做法，是有如茶樓或茶餐廳做下午茶餐的道理一樣：在顧客較少的時段才推出團購優惠，這樣做不會蠶食黃金時段的毛利，又可以谷多點生意。例如一間我很喜歡的日式燒肉店，我就買過幾次優惠晚市套餐，包括的食物相當豐富，但規定要7:30pm前離座。這個安排餐廳就可以吸引顧客在非常規的晚飯時間幫襯，多做一輪生意。 另外有一些餐廳 — 尤其是新開張的餐廳 — 認為可以借助團購網的人氣，以優惠吸引顧客幫襯。我相信每一個新老闆心裡面都有一團火、有一份信念：只要吸引到你來幫襯第一次，我有信心我們食物的質素可以吸引你再來！ 好一份志氣！！作為顧客，I will be back… 不過是當你再做半價優惠的時候先啦！ 胡亂做團購有一個很大的風險，就是扭曲了顧客對餐廳的期望。我以一個顧客的身份來解釋，本來正正常常一份 3-course 西餐，三、四百多元的價錢還算合理。但當我試了一次用半價就食到之後，我心裡面把尺就認為這間餐廳的價格是百多元；之後再要我用三百多元來食個晚餐，我就會突然覺得：有點兒貴！我還是等下一次見到團購優惠才再來了。結果，我心裡面是有一個無形的列表，有好些餐廳幾好食但無團購我是不會想到去食，我相信不少買團購的人也是這種想法，反正香港就是人多車多餐廳多！結果這些想靠團購打出名堂的餐廳可能弄巧反拙，只有當推出低毛利的團購時才有生意，無團購的日子就拍烏蠅！ 講吓講吓，我團購表上其中一間都幾好食幾用心做的餐廳，早幾天經過時發覺原來已經頂唔住結業了，阿彌陀佛。 Please come and like my Facebook Page if you find my blog interesting: https://www.facebook.com/jailbreakplato

Read More 團購要sell得其所

團購，相信很多人都試過。團購的原意是消費者跟商家佬講：嗱，如果我能夠集腋成裘幫你揾到50個客跟你買呢件貨，打個折呢！ 以數量換取折扣，一直都是經營買賣者的不二之門，否則又怎會有批發與零售之分。「團購」這概念剛登陸香港時，是真真正正要等成團的：我試過付了款買一件貨品，最後因為湊不夠訂單而泡了湯，要退款；不過時下的團購已經「變質」成特賣場或者限時優惠的模式，純粹以折扣吸引顧客，就算貨品只賣得一件都無問題，不再會發生成不了團的情景。 小弟都是團購粉絲，間唔中就會上幾個較大型的團購網站望望有沒有筍刁。我比較少在團購買貨品，因為見過幾次團購網會 mark 高個定價再打個六折俾你，我隨便上網格價就發現其實根本無平過！再者現在我們有偉大的淘寶，如果不是大牌子的產品，很多時自己去淘一淘都可以找到相同的啦！ 我買的多數是飲食相關的優惠 — 在香港出街食飯，無辦法用淘寶來代替了吧！如果買的是現兜兜的現金券，明碼實價知道便宜了多少；如果選擇的是一些優惠套餐，小弟就通常會揀自己有去過的餐廳，這樣有個概念知道平日在這間餐廳的消費是多少，比較容易判斷團購的優惠是否真的抵買。 還有，每次買的時候一定要望清楚優惠細則，e世代的好處是商家不再可以將這些條款用 font 6 寫出來，消費者就無咁容易眼大睇過籠，不過每次在按下「購買」前都一定要提醒自己好好的睇一次細則。最常見的「魔鬼」包括：只可以在冇雷公咁遠的分店兌換、只可以在平日最唔方便的時候 (ie 你返緊工時) 使用、要事前打電話訂抬但早兩個星期打去都話full晒、優惠一星期內就要用等等。 講咁耐，其實我本來是想分享一些商家參與團購的事情，誰不知一講到自身的經驗就停唔到，唯有下次《團購要sell得其所》繼續講！ Please come and like my Facebook Page if you find my blog interesting: https://www.facebook.com/jailbreakplato

Read More 團購要buy得其所