爆… 爆！

又到講故仔時間！

話說上星期一，醫生細妹 call 我：

「你咁奸嘅！係我最需要你時你唔覆我 message！」
「係咩？行開咗嘛！乜事？」
「我架車係告士打道爆咗軚呀！好辛苦先係條中線夾硬將架車駛埋去巴士站咋！不過阻住晒所有巴士埋站囉！」
「吓？咁而家點？」
「頭先打咗俾車房佬叫拖車啦，而家係間車軚舖換軚。你知唔知咩牌子好？」
「都係 Bridgestone 或者米芝蓮啦？！」……

(下刪一大段兩個車軚行外人的廢話討論…)

當晚我諗住揸車出去打波之際，想起老豆話架車條軚好似唔多夠氣，又想起醫生細妹今早個狼狽情況，心想都是穩陣d搞掂條軚先好。就叫埋老豆去停車場幫架車「打打氣」。不消10分鐘，就已經打好了三條軚，正當我磨拳擦掌準備出發去表演我的華麗球技時…

BOMB！！！

發生乜事！抬頭一望，只見車的另一邊有點煙霧迷漫的感覺，我跟老豆對望了一眼，走過去。剛剛才打脹的那條漏氣軚，爆了！整條軚扁了。

Oh well… 我第一時間想到的就是，叫今日換軚經驗豐富的醫生細妹活學活用，過來幫拖！

有多年駕駛經驗的老豆，鬆容不逼的指導我們如何換軚。不過當我們將所有螺絲都鬆了後，又遇到另一個難題：掹唔到條軚出來！點掹都掹唔到！

唯有又打去車房佬求救。車房佬話應該因為裡面生鏽，被鏽漬食實咗；叫我們盡力左右踢條軚，踢到鬆為止！我們跟著指示起勢咁踢，踢踢踢踢踢！踢到快可以練成碧咸的七璇斬，條軚都好像是風紋不動。但洗濕了頭，做晒嘢又換唔到軚實在唔忿氣，所以我們三人繼續踢踢踢！

終於，條軚好似郁了少少！於是我決定改變策略，當條軚好似玻璃樽蓋般，不斷左扭右扭。前後紐吓停吓足足5分鐘，才終於將條軚扭出來！我… 我… 我… 快無氣了！

條軚拿出來一看，發現一響雙爆，眼見起碼有兩條裂痕。條軚原來之前已經補過；見補軚個位，好似縫衣服般縫起，睇落好似有點兒嬉。咁都可以頂得住100公里時速的壓力走過多少轉的西九龍走廊，厲害！

究竟一日裡面兩架車爆兩條軚，有幾多機率呢？